កំពង់ធំ ៖ រដ្ឋបាលខេត្តកំពង់ធំ បានប្រកាសថាកាលពីថ្ងៃទី២៨ ខែមេសា ឆ្នាំ២០២១ ខេត្តកំពង់ធំបានរកឃើញវិជ្ជមានជំងឺកូវីដ១៩ ចំនួន ០៤ករណី នៅភូមិព្រៃវែង ឃុំទ្រៀល ស្រុកតាំងគោក ចំនួន៥នាក់ ក្នុងនោះមានទារិកាម្នាក់ អាយុ២ខែ និងកុមារីម្នាក់អាយុ ១២ឆ្នាំ។ នេះបើយោងតាមសេចក្តីប្រកាសព័ត៌មានរបស់រដ្ឋបាលខេត្តកំពង់ធំ នៅថ្ងៃទី២៩ ខែមេសា ឆ្នាំ២០២១នេះ។

រដ្ឋបាលខេត្តកំពង់ធំ អះអាងថា បុគ្គលទាំង ០៤នាក់នេះជាអ្នកពាក់ព័ន្ធនឹង ឈ្មោះ ឌឹម សុឃឿន ដែលត្រូវបានរកឃើញវិជ្ជមានកាលពីថ្ងៃទី២៥ ខែមេសា ឆ្នាំ២០២១។ 

កន្លងមកក្រុមគ្រូពេទ្យបានធ្វើតេស្តរហ័ស(Rapid Test) ដោយរកឃើញវិជ្ជមាន០៣នាក់ និងអវិជ្ជមាន ០១នាក់ បន្ទាប់មកក៏បានបញ្ជូនសំណាកទាំង០៤ទៅធ្វើ តេស្តបញ្ជាក់នៅវិទ្យាស្ថានប៉ាស្ទ័រ និងទទួលបានលទ្ធផលវិជ្ជមានទាំង ០៤ករណី នៅថ្ងៃទី២៨ ខែមេសា ឆ្នាំ២០២១។

បច្ចុប្បន្នអ្នកជំងឺកូវីដ១៩ ទាំង០៤នាក់ខាងលើនេះ ត្រូវបានដាក់ឲ្យសម្រាកព្យាបាលនៅមន្ទីរបង្អែកបារាយណ៍-សន្ទុក។

រដ្ឋបាលខេត្តបាន និងកំពុងធ្វើការស្រាវជ្រាវ និងយកសំណាកអ្នកពាក់ព័ន្ធនៅក្នុងភូមិព្រៃវែង ឃុំទ្រៀល ស្រុកតាំងគោក ដើម្បីធ្វើតេស្ដរកជំងឺកូវីដ១៩ យ៉ាងហ្មត់ចត់បំផុត៕